a b c d e f g h i j k l m n o p q r s t u v w x y z 0 1 2 3 4 5 6 7 8 9 #

lotfi double kanon - solta hagara | سلطة حقارة كلمات الأغنية

paroles de lotfi dk “solta hagara””كلمات لطفي “سلطة حقارة

“الجزائر حرّة ديمقراطية”
“الجزائر حرّة ديمقراطية”
“الجزائر حرّة ديمقراطية”
“الجزائر حرّة ديمقراطية”

[المقطع الوحيد]
لكانك راجل ام يتهموك
هوما يحبوك كيما الديوث
الشعب آو مغدور قاطع لحدود
الرعيس مغبون طايح ممدود
يحبوك مذلول تعاني وتموت
قصتنا تشابه لعاد وثمود
عندهم رهبان راحو جابوا الثابوت
واحنا عنا رهبان جابو جثة حتموت
نفس المفهوم نفس العادات
غيروا المسؤول مي نفس المعاناة
نفس الأحداث علا ذيك نتحداك
بلي السعيد او سراق كي حداد
كلش عادات قلهم ضرك صايي
الناس كل عالمة ضرك فدزاير وش صاير
حكومة تزوق بسيف كي الديزاينر
رعيس معوق ومريض بلالزايمر
رعيس مزير مسكين مشلول
والو ما يشوف المافيا لي يمشوه
النظام مجنون، النظام مجهول
النظام حا يضيع سكان الجنوب
الرعيس اليوم قلبوه أضحوكة
مبلاد لبلاد باش يديرولو حقنة
كلاولنا حقنا الناس اي ممحوقة
والجبال من جيجل لبجاية اي محروقة
قولو للرعيس لكانو حي
بلي الجريمة ٍي ولات في كل حي
بلي الشبيبة دركا ام رايحيين
الوزير كل يوم او يتحايل
قل للرعيس باه ماينساش
بلي سياستك آي صح ما تسواش
ديون لبلاد راحوا صدقوها بلاش
والزوالي يخلص غرامة لونساج
قل للرعيس بوتفليقوس
الحراقة غرقوا حاصلين الكل في تونس
جوناس مدروقيا طايحين اوفردوز
الناس في طاكوت تموت بالسيليكوز
قول للرعيس بالاك يعقال
الدنيا راي فانية والفوق نتلاقاو
عالانتقاد كل يوم كاين اعتقال
وعلى جال المقال كل يوم كاين العقاب
قول للرعيس لكانك واعي
خوك المحبول آو قالهم البلاد تاعي
كلهم أتباعي، كلهم أفاعي
وصحاب الشّيتة خرفان ورا الرّاعي
قول للرعيس البركة في راسك
حياتك خلاصت وانت مازال لاصق
خوك راهو واصل، آو لابس الماسك
يسنيي ويقرّر ويحكم في بلاصتك
قول للرعيس لكان يتنفّس
بلّي الجزاير كل يوم راهي تفلس
بلّي الدّينار راهو طايح مكدّس
والاقتصاد تاعنا راو رايب مهرّس
قول للرعيس راهو محبوس
بلادنا راي شابّة رجعوها عجوز
حتّى باسم الله ولّات لا يجوز
اليوم جات بن غربيط حا تقلبنا مجوس
قول للرعيس والله تتجازى
العباد تموت ولّات كل يوم جنازة
النّاس آي محتاجة، السبيطار عاد نجاسة
والرعيس وينو؟ خمس سنين في إجازة
قول للرعيس يزّي بلا رقدة
الشّعب آو محتاج وانت عاطيه بركلة
حبّس روح داوي كان صحتك مبركلة
ضيّعتوا الشّبيبة من سطيف حتّى لورقلة
قولو للرعيس واش بيك مازلت؟
ملّي طلعوك في الكرسي جامي نزلت
اليوم راك مضرور وفي السرير اتعزلت
روح شوف تندو، أدرار وتيسمسيلت
قولو للرعيس حالتك آي تخلع
البلاد خالوطة وفي الحيط راهي داخلة
النّاس آي موخدة، سمعتوا باللّخرة؟
جابوا أو يا حيا، دوركا تزيد تخلى
قولو للرعيس ماشنا أنانيين
ندعيك بالرّحمة يا ربّي آمين
أعراضك باينين، أعضاءك ميتين
يعني لازم نطبقو المادّة مئة واثنين
قولو لأو يا حيا وجهك صحيح
خربتوا الخزينة وما بقى غير الرّيح
البلاد آي اطّيح، كل يوم راي اضّيع
ونتوما عقاب رايس جثّة فوق ضريح
شكون لي ما كلاش؟ شكون لي ما دّاش؟
ما بقات لا صناعة، لا زرع، لا إنتاج
وقت البحبوحة ادّيتوها تقلاش
واليوم تخدمو برعيس شفتوه مرمي في فراش
كلّش خماج، السّرّاق آو باين
وأنت أو يا حيا راك معروف بهاذ لعمايل
أنت اك مكروه من قالمة لولاد نايل
مكروه عند العرب، الشّاوية والقبايل
يا السي أو يا حيا مازال تبلعط؟
دركا تزيد تسرق السّوارد لي اطبعت
ملّي شفناك بلادنا جامي طلعت
وملّي جابوك الحرّاقة الكل قلعت
يا السي أو يا حيا عيوبك بانوا
ألف مليار راحوا غبار شي ما داروا
لي والا يحلم يهاجر من بلادو
والراعس آو دايخ والله ما علابالو
يا السي أو يا حيا بلادنا في لاكريز
أنت اك مسؤول والرئيس كومبليس
من التسعين وأنت تالب كي بليس
بلاصتك مش وزير، بلاصتك في لامبيس
يا السي أويحي حكومتك وهميّة
تخوفو في الشّعب بالحروب الأهليّة
تجيبو في الشّراب باش النّاس تعود ملهيّة
هلكتو التّعليم باه تمحيو الهويّة
يا السي أو يا حيا سكّتنا حسّك
النّاس الكل تدعي وقتاه الحبس يهزّك
اليوم راك تتكسّل وتعفّس باسمك
كرهوك لي من أصلك والنّاس لي في حزبك
يا السي أو يا حيا النّأس آي كشفاتك
النّاس آي شافاتك، تعرف ملفّاتك
الناس آي عرفاتك كيفاه سرقت بلادك
وبنيت شركات لمرتك وأولادك
يا السي أو يا حيا

[فاصل]
“حقّارين، حقّارين”

الرّجال الجيش حاربوا الإرهاب
اليوم راي في الطريق تُضرب تُهان
حاكمينا بهايم في بلاد أوهام
الجندي مضروب تحت أوامر الخامل
ويني الرّجولة؟ ويني الشّهامة؟
وين هو الشّعب تاع أولاد الشّهداء؟
داروا الشّي هذا خاطاك مش رجالة
والجنرال خاين والسّلطة هجّالة
جندي مجاهد تحيّة خاصّة
شكون ينسى الخير تاع القوّات الخاصّة
القيادة تحوّس من بلاصة لبلاصة
والجندي مخيّط رصاصة برصاصة
قولّي شكون قاصا؟ شكون كان يتيري؟
في الونشريس، في الجلفة والمتليلي
اليوم المسؤول راو غير بيرّة وبيريري
والرّجال آي في الحبس كيما عمّار البيري
الجندي المتقاعد، الجندي المعطوب
جا يطلب حقّو، راحوا طردوه
الإرهابي يدور، السّلطة عرضوه
والجندي جابولو كلاب يعضّوه
شكون المضرور؟ شكون لي يقاسيو؟
شكون لي مبليسي ورجليه مقصوصين؟
ولد الوزير ام عطاولو لوزين
والجندي راو مسكين زادولو ربع سنين
الظّلم آو يسيل الصّباح والعشيّة
السّلطة مبيوعة، السّلطة مشرية
سوارد الشّعب عطاوهم للجيا
الجندي مازالو يحاسبوه على الشّهرية
الجندي كل ليلة حراسة بالدّالة
الجندي في الجبال والظروف آو عمبالنا
الجنود تعبانة، واقفين معانا
وبنت الوزير في الفايسبوك آي عريانة
ساكرة وعميانة عطاوها بيريطا
ساهرة بالريكارد في الريزيدونس ديطا
الجنود مريضة، حياتها كارثة
ساهرة بكلاش ولاشيز في غاريطا
شحال من جندي عندو جرح جامي برا
شحال من جندي حتى لليوم راهم مراض
شحال من جندي راو مدفون تحت التّراب
والتّكريم يمدّوه للرّقّاصات تاع تيمقاد
شحال من جندي أمّو عليه آي بكات
شحال من جندي تقاس برصاصة وروكيت
شحال من جندي ولادو اليوم آي تكوات
والوزير وجماعتو شبعو ممتلكات
لي حكموا البلاد ما عرفوش قيمة الرّاجل
الجندي يبات يحرس من اللّيل حتّى الفجر
الجندي يتهجّر، في الجبال آو يتفجّر
والربعمية مليون يدّيهم رابح ماجر
يعني في لّخر بلادنا آي شاعلة
حاكمينها مافية لي تحقر في شعبنا
الرعيس حا يموت، بقاتلو غير شحقة
والفايد ظهر خردة، مئة كيلو شحمة

[اللازمة]
السلطة حقّارة، السّلطة حقّارة
الشّعب الكل راو يعاني
السلطة حقّارة، السّلطة حقّارة
الظّلم اليوم آو ولّا عادي
السلطة حقّارة، السّلطة حقّارة
لي حكموها غير لمعاليم
السلطة حقّارة، السّلطة حقّارة

- lotfi double kanon

كلمات أغنية عشوائية

كلمات الأغاني الشهيرة