a b c d e f g h i j k l m n o p q r s t u v w x y z 0 1 2 3 4 5 6 7 8 9 #

ahmed mekky - akhret al shaqawa كلمات الأغنية

[المقطع الأول]
إسمي قرن الغزال، بس إسم الشهرة مطواة
بدي لصاحبي هيبة، الناس تهابه يكون له سطوة
جسمي قد كفك، مصنوع فولاذ وعاج
تعض عضمي بسنانك يجيلك إرتجاج
أوكابي ألماني، على سلاحي منقوشة خوجة
سن سلاحي موسه حامي يفوت في اللحمة النية نوجة
تلات نجوم و هلال وهلال فوق جسمي زينة
مطيع لصاحبي و مخلص، اللي يعوزه يلا بينا
ياما هوشت وحوش، ياما شوهت وشوش
ياما فتحت كروش لناس باتت راقدة في نعوش
لو عرقبت رجل بزاوية صح لواحد ماتشيلوش
لما بظهر فجأة الناس تجبن تجري ولو جيوش
صوت فتح سلاحي بيجيب لصاحبي جنان
قتل عور وزفر سن سلاحي ومش ندمان
قلبه وإحساسه ماتوا ونظرة عينه ديب سعران
إنسان من بره بس من جوه إتقلب شيطان

[اللازمة]
عيني على صاحب فجر، قدرناه ولا طمر
سوق فيها يا بونتي أكتر، ماشي يا عم الدكر
إحنا على وضعنا، لو عيشنا و ملحنا
مابقوش لادين عليك، يابا وإستنقصتنا
الدنيا سلف و دين، ومسيرك تنقرص
وتقول يا صاحبي فينك يا شقي، أقول كان فيه و خلص

[المقطع الثاني]
رحال و كعبي داير، لفيت الدنيا لف
من إيد مالك لمالك، بتنقل من كف لكف
صحيح البحر واحد، بس السمك أنواع
مريت على الجبان و البق و العترة الشجاع
فيه اللي كان بيعمل بيا نمرة و يرقص في الأفراح
فيه اللي قدروني صح و شافوا فيا أقوى سلاح
كل فترة أعيشها بتبقى شكل صاحبي
أحداث وناس جديدة وكل واجبي صاحبي أحمي
و صاحبي الحالي واعر، تاجر مخدرات
فتوة و كفه سابق مش هامه أي حوارات
بديت معاه من الصفر، ما كانش يسيبني لحظة
ما كانش يجيله نوم إلا أما أكون تحت المخدة
واحدة واحدة صيته ذاع، واخدها بالدراع
أفيونته تحت لسانه وشايه تقيل وبالنعناع
لما تقوم خناقة ويبدأ يتعصب و يغل
يأمن إني في جيبه و يأمن على الأبتريل
عور بيا ياما، قتل تلات مرات
آخرهم جارد جثة بره بار من البارات
الناس بقت تخافه وتهابه وتعمله حساب
واللي بيعترض طريقه بتبقى عيشته هباب
عمل لنفسه ضهر وبعلاقات ثبت وجوده
وزود حجم دولابه، تاجر هيروين وڤودو

[المقطع الثالث]
صاحبي كبر وإتوحش، لعب معاه القرش
جاب مرسيدس، ساعة دهب، نشاط تاني على الوش
فيه تحته جيش رجالة بأمره ينفذوا التمام
وفي طبنجة تسعة ملي وفي آلي دفع أرقام
خلاص إستغنى عني، ما بقيتش قد المقام
بقيت أعره لو ظهرت معاه خلاص مات الكلام
فحطني في صندوق جزم قديم رماه فوق الدولاب
أكتر من تلات سنين مرمي رمي الكلاب
جنبي في الصندوق ورق مضروب وذكريات
حشيش قديم نشف وصورة لإبنه اللي مات
من خبرتي بالناس حافظ حبة أمثال
“أكترهم مؤمن بيه “دوام الحال من المحال
طغيان صاحبي ونفوذه خلت العين عليه
و الكوك لحس دماغه والغرور عماله عينيه
شبه إحتكر السوق فولاد الكار قالبين عليه
حتى الحكومة هاجت ماجت قررت حاطين عليه
كام واحد من رجالته عاملين معاه الجلاشة
باعوا سره للحكومة فإتعمل عليه كماشة
أختاروا يوم كان كانز فيه في البيت تقريباً تُمن طن
هيروين و كوكايين، شكل الكمية حاجة تجن
البوليس هجم كبس على البيت بالليل الساعة تسعة
مطر من ضرب نار أغلبهم للهروب بيسعى
بس صاحبي قلبه ميت شد لاين و قام يدافع
بالعروسة التسعة ملي قام يهاجم تانه راجع
حد فضى خزنة المسدس من وراه
حتى الآلي إختفى دة بفعل فاعل يا ولداه
صاحبي هرش وإستوعب إنه إتباع وعلى المشاع
هيعيش لو سلم نفسه هيموت لو عمل شجاع
ما حسش بالأمان، عمل زي زمان
دب إيده في جيبه يجيبني فإفتكر كل اللي كان
أخيراً إفتكرني و جابني من فوق الدولاب
فرحت إنه بيلجألي تاني و هنرجع صحاب
أول ما مسكني إستغرب شكلي أصلي مردوم بالتراب
باظت لحظة فرحتي من قوة رزعة كسر الباب
بوليس كتير دخل بسلاح والكل كان مكشم
صاحبي فتح سلاحي ما إتفتحش أصله تلم
عمري ما أقدر أنسى نظرة عينه ليا، كان مبلم
شكله فكر إني خنته، عينيه ليا بتتكلم
خد طلقة وسط دماغه وراها رصاص كتير
وقع غرقان في دمه وأنا إترميت بطير
وقعت جنبه و شفته بيطلع آخر زفير
صاحبي اللي كان فرعون، آدي شكل المصير
وفجأة في وسط زحمة الأوضة اللي كانت شديدة
في إيد جت كمرتني، شكلي داخل قصة جديدة

[جسر]
آخرة الشقاوة
يا موت، يا عيش و حلاوة

- ahmed mekky

كلمات أغنية عشوائية

كلمات الأغاني الشهيرة